Sinopsis

Tres amigas cumprirán a derradeira vontade dunha compañeira: dar fin ás súas cinzas alí onde aquel cuarteto simétrico disfrutara as mellores tardes. Unha recén casada acudirá a unha adiviñadora para coñecer noticias certas do seu home, tripulante dun barco desaparecido. Un humilde albanel parisino relata á policía o derradeiro paseo en carreta da muller do pintor Modigliani. Os cadáveres de dous vellos Laurinda e Francisco, aparecen comunicados, cousa que en vida rara vez ocorrera. Un transportista realizará unha longa viaxe de volta acompañado do cadáver dun seu amigo. Un empresario falece no cuarto dun motel; suceso que tentará agachar o dono do establecemento que contará coa comprensión da propia muller do finado. Un suicida inconsistente converterase en Noiteboa no autor de tres asasinatos en cadea. As cinzas dun emigrante arxentino, que se resistira a desaparecer en vida, perderanse nos labirintos dalgún aeroporto. Faneca Brava deixa mandado que se lle faga un enterro viquingo: debe ser levado na súa chalana fóra da ría e alí plantarlle lume. O Moañés fai prometer aos seus compañeiros de tripulación que se morre embarcado en Terranova, levarano a enterrar á súa parroquia. Guillerme, décimo duque de Aquitania, peregrina, baixo o nome de Gaiferos de Mormaltán, coa intención de descubrir o que pensa é unha falsidade que atenta contra toda lóxica. Tódolos relatos reunidos en Acompáñoo no sentimento abordan con desenfadada ironía e humor retranqueiro diversas formas de facerlle fronte ao momento inmediatamente posterior á morte, ese tempo de ninguén onde a vida non ten onde agarrarse e os mortos aínda non forman parte da nosa memoria. Dotado dunha inusual contundencia narrativa, o autor demostra que o fascinio por contar é o que mellor diferencia ós seres humanos de calquera outros seres vivos.